அரசியலில் நிரந்தர எதிரி, நிரந்தர நண்பன் இல்லை: ‘தங்கதமிழ்ச்செல்வன் வந்தால் ஏற்றுக்கொள்வோம்' ஜெயக்குமார் கருத்து
அரசியலில் நிரந்தர எதிரி, நிரந்தர நண்பன் இல்லை என்றும், தங்கதமிழ்ச்செல்வன் வந்தால் ஏற்றுக்கொள்வோம் என்றும் ஜெயக்குமார் தெரிவித்துள்ளார்.
பதிவு: ஜூன் 23, 2019 00:00 AM மாற்றம்: ஜூன் 23, 2019 02:32 AM
சென்னை,

டி.டி.வி.தினகரன் தலைமையிலான அம்மா மக்கள் முன்னேற்ற கழகம் கட்சியில் (அ.ம.மு.க.) கொள்கை பரப்பு செயலாளராக இருப்பவர் முன்னாள் எம்.எல்.ஏ. தங்கதமிழ்ச்செல்வன். இவர் நடந்து முடிந்த தேர்தலில் தேனி நாடாளுமன்ற தொகுதியில் அ.ம.மு.க. சார்பில் களம் இறங்கி தோல்வியை தழுவினார்.

இந்தநிலையில் தேர்தலுக்கு பின்னர் அ.ம.மு.க.வில் இருந்து முன்னாள் அமைச்சர்கள், எம்.எல்.ஏ.க்கள் உள்பட முக்கிய பிரமுகர்கள் சிலர் விலகி, மீண்டும் அ.தி.மு.க.வில் சேர்ந்து வருகின்றனர். அந்தவகையில் தங்கதமிழ்ச்செல்வனும் அ.ம.மு.க.வில் இருந்து விலகி, அ.தி.மு.க.வில் சேரப்போவதாக சில தினங்களுக்கு முன்பு தகவல் வெளியாகியது.

இதற்காக தங்கதமிழ்ச்செல்வன் சமீபத்தில் சில மூத்த அமைச்சர்களை சந்தித்ததாகவும், அவர்களிடம் அ.தி.மு.க.வில் சேருவதற்கு விருப்பம் தெரிவித்ததாகவும் பரபரப்பான தகவல்கள் வெளியாகியது. இது அரசியல் வட்டாரத்தில் பரபரப்பை ஏற்படுத்தியது.

இதுகுறித்து கருத்து தெரிவித்து அமைச்சர் ஜெயக்குமார் கூறியதாவது:-

அ.ம.மு.க. ஒன்றும் இல்லாத புஷ்வானம் ஆகிவிட்டது. இதனால் அந்த கூடாரம் காலி ஆகிவிட்டது. எனவே பிரிந்து சென்றவர்கள் மீண்டும் அ.தி.மு.க.வில் வந்து சேரவேண்டும் என்று முதல்-அமைச்சர், துணை முதல்-அமைச்சர் உள்பட அனைவரும் வேண்டுகோள் விடுத்து வருகிறோம். ஜெயலலிதா கூறியது போன்று பல நூற்றாண்டுகள் இந்த கட்சியும், ஆட்சியும் நிலைக்கவேண்டும். இதற்காக பிரிந்து சென்றவர்கள் வந்து சேருங்கள்.

சசிகலா மற்றும் டி.டி.வி.தினகரன் உள்பட அவருடைய குடும்பத்தினர் தவிர யார் வந்தாலும் ஏற்றுக்கொள்வோம். அரசியலில் நிரந்தர எதிரியும் இல்லை. நிரந்தர நண்பனும் இல்லை. தங்கதமிழ்ச்செல்வன் உள்பட என்னுடைய நண்பர்கள் யார் வந்து சேர்ந்தாலும் ஏற்றுக்கொள்வோம். தங்கதமிழ்ச்செல்வன் இப்போது அ.தி.மு.க.வில் சேருவது என்ற சரியான பாதைக்கு வந்திருக்கிறார். இவ்வாறு அவர் கூறினார்.

இதற்கிடையே அ.தி.மு.க. வில் இணையப்போவதாக வெளியான தகவல் குறித்து தங்கதமிழ்ச்செல்வனிடம் கேட்டதற்கு அவர் பதில் எதுவும் கூற மறுத்துவிட்டார். மேலும் அவருடைய செல்போன் எண்ணை தொடர்புகொண்டபோது, அதை தவிர்த்துவிட்டார்.

சென்னை புரசைவாக்கத்தில் உள்ள கங்காதீசுவரர் கோவிலில் அ.தி.மு.க. சார்பில் மழை வேண்டி சிறப்பு யாகம் நடந்தது. இதில் பங்கேற்ற மீன்வளத்துறை அமைச்சர் ஜெயக்குமார், கோவில் வளாகத்தில் மரக்கன்று ஒன்றையும் நட்டார்.

யாகம் முடிந்த பின்னர் அமைச்சர் ஜெயக்குமாரிடம் நிருபர்கள் கேட்ட கேள்விகளும், அதற்கு அமைச்சர் ஜெயக்குமார் அளித்த பதில்களும் வருமாறு:-

கேள்வி:- காங்கிரசை எத்தனை நாட்களுக்குத் தான் நாங்கள் தூக்கி சுமப்பது, உள்ளாட்சி தேர்தலில் தி.மு.க. தனித்து போட்டியிடவேண்டும் என்று முன்னாள் அமைச்சர் கே.என்.நேரு கூறியிருக்கிறார். அதுபற்றி உங்கள் கருத்து என்ன?

பதில்:- இது அவர்களுடைய கூட்டணி கட்சி பிரச்சினை. காங்கிரஸ் கட்சி தினத்தந்தியில் வரும் கன்னித்தீவு சிந்துபாத் கதையை போன்று 1967-ம் ஆண்டுக்கு பிறகு யார் முதுகிலாவது ஏறி சவாரி செய்வதையே வழக்கமாக கொண்டிருக்கிறது.

கேள்வி:- சட்டமன்றம் கூட இருக்கிறது. எதிர்க்கட்சி எழுப்பும் பிரச்சினைகளை தயார்கொள்ள அ.தி.மு.க. தயாராக இருக்கிறதா?

பதில்:- அனைத்தையும் எதிர்கொள்வதற்காக திராணி, தெம்பு, தைரியம் ஆட்சிக்கும், கட்சிக்கும் இருக்கிறது. அரசியல் செய்வதற்கு எதுவும் இல்லாததால் தண்ணீரை வைத்து அரசியல் செய்கிறார்கள். இந்த சூழ்நிலையிலும் லாரி மூலமாக 520 எம்.எல்.டி. தண்ணீர் கொடுப்பதற்கு தி.மு.க. தலைவர் மு.க.ஸ்டாலின் வாழ்த்து தெரிவித்தால் நல்லது. நாங்கள் அவரை எதிர்க்கட்சியாக பார்க்கிறோம். ஆனால் அவர் எங்களை எதிரியாகவே பார்க்கிறார். இவ்வாறு அவர் பதில் அளித்தார்.
மேலும் செய்திகள்
‘மாவட்ட தலைவர்கள் 3 விதமான தேர்வை சந்திக்க வேண்டும்’ காங்கிரஸ் நிர்வாகிகள் கூட்டத்தில் கே.எஸ்.அழகிரி கெடு விதிப்பு
மாவட்ட காங்கிரஸ் தலைவர்கள் தொடர்ந்து பதவியில் நீடிக்க வேண்டும் என்றால் 3 விதமான தேர்வை சந்திக்க வேண்டும் என்று கே.எஸ்.அழகிரி கெடு விதித்தார்.
பதிவு: ஜூன் 22, 2019 00:00 AM மாற்றம்: ஜூன் 22, 2019 03:24 AM
சென்னை,

தமிழ்நாடு காங்கிரஸ் கட்சி அலுவலகமான சத்தியமூர்த்தி பவனில் உள்ளாட்சி தேர்தல் குறித்த மாவட்ட தலைவர்கள், நிர்வாகிகள் ஆலோசனை கூட்டம் நடந்தது. இந்த கூட்டத்திற்கு மாநிலத்தலைவர் கே.எஸ்.அழகிரி தலைமை தாங்கினார். மேலிட பொறுப்பாளர்கள் சஞ்சய்தத், சிரிவல்லபிரசாத் ஆகியோர் முன்னிலை வகித்தனர். செயல் தலைவர் எச்.வசந்தகுமார் எம்.பி., முன்னாள் தலைவர்கள் கே.வி.தங்கபாலு, கிருஷ்ணசாமி, முன்னாள் மத்திய மந்திரி தனுஷ்கோடி ஆதித்தன், மாவட்ட தலைவர்கள் கராத்தே தியாகராஜன், எம்.எஸ்.திரவியம் உள்பட பலரும் கலந்து கொண்டனர். கூட்டத்தை தொடங்கி வைத்து கே.எஸ்.அழகிரி பேசினார்.

கூட்டத்தில் கே.எஸ். அழகிரி பேசியதாவது:- மாநில காங்கிரஸ் தலைமை மாறும்போது பொதுவாக 10 அல்லது 20 மாவட்ட தலைவர்களை மாற்றுவார்கள். இது கடந்த காலங்களில் நடந்த வரலாறு. தலைவருக்கு ஒத்துழைப்பு வழங்குவதற்காக இதுபோன்ற நடவடிக்கைக்கு கட்சியின் தேசிய தலைமை அனுமதி வழங்கும். ஆனால் நான் மாவட்ட தலைவர்களுக்கு 3 விதமான தேர்வு வைக்க இருக்கிறேன். அது என்ன மாதிரி தேர்வு என்பதை பின்னால் சொல்கிறேன். தேர்வில் வெற்றி பெறுகிறவர்களே மாவட்ட தலைவர்களாக நீடிக்க முடியும். மற்றவர்கள் இப்போதே விலகிக்கொள்ளலாம்.

உள்ளாட்சித் தேர்தலில் அவரவர் மாவட்டங்களில் 100 சதவீதம் காங்கிரசார் போட்டியிட ஏற்பாடு செய்ய வேண்டும். வெற்றிக்கு கூட்டணியை நம்பியிருக்கக் கூடாது, அவர்கள் வெற்றிக்கு உதவுவார்கள், நாம் தான் உழைக்க வேண்டும்.

இவ்வாறு கே.எஸ். அழகிரி பேசியதாக நிர்வாகிகள் தெரிவித்தனர்.

கூட்டத்தில், அகில இந்திய காங்கிரஸ் தலைவராக ராகுல்காந்தி தொடர்ந்து நீடிக்க வலியுறுத்தி தீர்மானம் நிறைவேற்றப்பட்டது. மேலும், புதிய கல்விக்கொள்கை குறித்து மக்களிடையே விழிப்புணர்வை ஏற்படுத்த மாவட்ட தலைவர்கள் தமிழகம் முழுவதும் கருத்தரங்கம் நடத்த தீர்மானம் நிறைவேற்றப்பட்டது.
மேலும் செய்திகள்
தமிழக மக்களின் நலனுக்காக எடப்பாடி பழனிசாமி மேற்கொண்ட அரிய முயற்சிகளை அழிக்க முயற்சிக்கிறார் மு.க.ஸ்டாலின் மீது அமைச்சர் டி.ஜெயக்குமார் குற்றச்சாட்டு
தமிழக மக்களின் நலனுக்காக முதல்-அமைச்சர் எடப்பாடி பழனிசாமி மேற்கொண்ட அரிய முயற்சிகளை மு.க.ஸ்டாலின் அழிக்க முயற்சிக்கிறார் என்று அமைச்சர் டி.ஜெயக்குமார் குற்றம்சாட்டியுள்ளார்.
பதிவு: ஜூன் 19, 2019 00:00 AM மாற்றம்: ஜூன் 19, 2019 05:18 AM
சென்னை,

இதுகுறித்து மீன்வளம், பணியாளர் மற்றும் நிர்வாக சீர்திருத்தத்துறை அமைச்சர் டி.ஜெயக்குமார் வெளியிட்டுள்ள அறிக்கையில் கூறப்பட்டு இருப்பதாவது:-

தமிழக முதல்-அமைச்சர் டெல்லி பயணத்தின்போது தமிழக நலனுக்காக முன்வைத்த உரிமைக்குரலை விமர்சிப்பது, தி.மு.க. தலைவர் மு.க.ஸ்டாலினின் குதர்க்க புத்தியையும், கோயபல்ஸ் முயற்சியையுமே காட்டுகிறது.

அங்கு நடந்த நிதி ஆயோக் கூட்டத்தில் கலந்து கொண்ட முதல்-அமைச்சர் எடப்பாடி பழனிசாமி, தமிழ்நாட்டின் தேவைகளை பற்றியும், உடனடியாக தமிழ்நாட்டில் நிறைவேற்றப்பட வேண்டிய திட்டங்களுக்கு மத்திய அரசு உதவ வேண்டியதன் அவசியத்தை பற்றியும், விரிவாக தனக்கு ஒதுக்கப்பட்ட நேரத்தைவிட கூடுதல் நேரத்தில் உரையாற்றியுள்ளார்.

கூட்டம் நடப்பதற்கு முன்பு பிரதமர் நரேந்திர மோடியை சந்தித்து தமிழகத்தின் உடனடி தேவைகளை தொகுத்து, கோரிக்கை மனு ஒன்றை யும் அளித்திருக்கிறார். அந்த கோரிக்கைகளின் தொகுப்பு ஆகியவற்றையெல்லாம் மு.க.ஸ்டாலின் தெரிந்து கொள்ளாமல், தனது கட்சிக்காரர்களின் அராஜகத்தை மூடி மறைக்கவும், தமிழக மக்களின் நலனுக்காக முதல்-அமைச்சர் மேற்கொண்ட அரிய முயற்சிகளை மக்கள் பார்வையில் இருந்து அழிக்க முயற்சிக்கும் வண்ணம், வீண் அவதூறு பரப்பும் அறிக்கை ஒன்றை மு.க.ஸ்டாலின் வெளியிட்டிருப்பது காழ்ப்புணர்ச்சியின் வெளிப்பாடு என்பதே உண்மை.

பிரதமரிடம் அளித்த கோரிக்கை மனுவில், கோதாவரி-காவிரி இணைப்புத் திட்டம், முல்லைப்பெரியாறு அணை பிரச்சினை, மேகதாதுவில் காவிரியின் குறுக்கே ஒருபோதும் அணை கட்டப்படக்கூடாது என்பதில் உறுதி, சென்னை பசுமை விமான நிலையம், சென்னை மெட்ரோ ரெயில் - கட்டம் 2, தமிழ்நாட்டிற்கான நிலுவை மானியங்கள் கோருதல், உள்ளாட்சி அமைப்புகளுக்கான மானியத்தை விடுவித்தல், சரக்கு மற்றும் சேவை வரி இழப்பீடு, நீட் தேர்விலிருந்து தமிழகத்திற்கு விலக்கு உள்ளிட்ட அனைத்து கோரிக்கைகளையும் பிரதமரிடம், முதல்- அமைச்சர் விளக்கிக் கூறியிருக்கிறார்.

அதோடு, மத்திய உள்துறை மந்திரி, மத்திய நிதித்துறை மந்திரி, தரைவழிப் போக்குவரத்துத்துறை மற்றும் நீர் மேலாண்மைத்துறை மந்திரி ஆகியோரையும் சந்தித்து, தமிழ்நாட்டிற்கு தேவையான திட்டங்களை விரைந்து நிறைவேற்ற உதவ வேண்டும் என்றும் முதல்-அமைச்சர் கேட்டுக்கொண்டார். முதல்- அமைச்சர் வலியுறுத்திய காரணத்தால், கோரிக்கைகளை விரைந்து நிறைவேற்ற ஆவண செய்வதாகவும் அவரிடம் தெரிவிக்கப்பட்டிருக்கிறது.

இந்த உண்மைகளையெல்லாம் மூடி மறைத்து, தனது தி.மு.க. கட்சியின் நிர்வாகிகள் நாகர்கோவிலில் நடத்திய அராஜகத்தையும், சட்டத்தை மீறிய செயல்களையும் மக்கள் பார்வையிலிருந்து மறைத்துவிடும் நோக்கத்திலும், சிங்கப்பூர் செல்லும் அவசரத்திலும் முழு உண்மையையும் தெரிந்துகொள்ளாமல் மு.க.ஸ்டாலின் அவதூறு பரப்பி அறிக்கை வெளியிட்டிருப்பது கண்டிக்கத்தக்கது.

ராகுல்காந்தி கர்நாடக தேர்தல் பிரசாரத்தின்போது, மத்தியில் காங்கிரஸ் ஆட்சிக்கு வந்தால் காவிரி ஆற்றின் குறுக்கே மேகதாதுவில் அணை கட்டப்படும் என்றும், தமிழ்நாட்டு மக்கள் நலனுக்காக 50 ஆண்டுகாலம் போராடி அண்மையில் அமைக்கப்பட்ட காவிரி மேலாண்மை ஆணையம் கலைக்கப்படும் என்றும் பேசியதை இதுநாள்வரை மு.க. ஸ்டாலின் கண்டுகொள்ளவில்லை.

அதைக் கண்டிக்காமலும் இருக்கும் அவர், தமிழ்நாட்டு மக்களுக்காக அயராது பாடுபடும் முதல்-அமைச்சரைப் பற்றி பேசுவதற்கு அறுகதை இல்லை. நிதி ஆயோக் கூட்டத்தில் முதல்-அமைச்சர் ஆற்றிய உரையையும், பிரதமரிடம் அளிக்கப்பட்ட கோரிக்கை ஆவணத்தையும் சிங்கப்பூரிலிருந்து திரும்பி வந்ததும் நிதானமாக மு.க.ஸ்டாலின் படித்துப்பார்த்து தெளிவு பெறவேண்டும். இவ்வாறு அதில் கூறப்பட்டுள்ளது.
மேலும் செய்திகள்