இந்தியை கட்டாயப்படுத்தி திணிக்க முயல்வதா? அரசியல் கட்சி தலைவர்கள் கண்டனம்
புதிய கல்வி கொள்கை என்ற போர்வையில் இந்தியை கட்டாயப்படுத்தி திணிக்க முயல்வதற்கு அரசியல் கட்சி தலைவர்கள் கண்டனம் தெரிவித்து உள்ளனர்.
பதிவு: ஜூன் 03, 2019 00:00 AM மாற்றம்: ஜூன் 03, 2019 03:52 AM
சென்னை,

இது குறித்து தமிழக அரசியல் கட்சி தலைவர்கள் விடுத்துள்ள கண்டன அறிக்கையில் கூறியிருப்பதாவது:-

தமிழ்நாடு காங்கிரஸ் தலைவர் கே.எஸ்.அழகிரி:- பா.ஜனதாவின் சுயரூபம் பிரதமர் மோடி தலைமையில் மந்திரிசபை அமைந்த உடனேயே அம்பலமாகி உள்ளது. கஸ்தூரி ரங்கன் குழு அளித்த புதிய கல்வி கொள்கை வரைவு அறிக்கையில் 6-ம் வகுப்பு முதல் இந்தி மொழி பாடம் கற்பிக்க பரிந்துரை செய்யப்பட்டுள்ளது. தமிழகத்தை பொறுத்தவரை இந்தி மொழி திணிப்பை நீண்டகாலமாக எதிர்த்து போராடி தடுத்த வரலாறு உண்டு.

நாடாளுமன்றத்தில் 2 தி.மு.க. எம்.பி.க்கள் இருந்த போதும், அவர்களின் கோரிக்கைக்கு மதிப்பளித்து அப்போதைய பிரதமர் நேரு நாடாளுமன்றத்தில் உரையாற்றும்போது, “எந்த மொழியையும் எவர்மீதும் திணிக்கக்கூடாது. நமது அரசியல் அமைப்பு சட்டத்தில் குறிப்பிட்டுள்ள அனைத்து மொழிகளும் சம அந்தஸ்துடன் நடத்தப்பட வேண்டும். இந்தியாவில் எந்த ஒரு மொழியும் மற்ற மொழியை தாண்டி, தேசிய மொழியாக இருக்கும் என்ற பேச்சுக்கே இடமில்லை” என்று 1960-ம் ஆண்டு ஏப்ரல் 24-ந் தேதி கூறினார்.

நேரு வழங்கிய உறுதிமொழிக்கு எதிர்காலத்தில் ஏதாவது ஆபத்து ஏற்பட்டால் அதை தடுக்கவே முன்பு பிரதமர்களாக இருந்த லால்பகதூர் சாஸ்திரியும், இந்திரா காந்தியும் ஆட்சி மொழி சட்டத்தில் திருத்தம் கொண்டு வந்தார்கள். இதையும் மீறி புதிய கல்வி கொள்கை என்ற போர்வையில் மும்மொழி திட்டத்தை புகுத்தி இந்தி மொழியை கட்டாயப்படுத்தி திணிக்க முயன்றால் மத்திய பா.ஜனதா அரசுக்கு எதிராக கடுமையான போராட்டங்களை நடத்த வேண்டியது வரும்.

திராவிடர் கழக தலைவர் கி.வீரமணி:- மத்திய அரசின் புதிய கல்வி கொள்கைக்கான வரைவு திட்டத்தில் இந்தி பேசாத மாநிலங்களில் 3-வது மொழியாக இந்தி மட்டும் தான் கட்டாயம் இருக்கும் என்று தெரிவிக்கப்பட்டுள்ளது. மோடி தலைமையிலான தேசிய ஜனநாயக கூட்டணி அரசு தனது இரண்டாம் பயணத்தின் தொடக்கத்திலேயே இந்தி பேசாத மாநிலங்களின் தலையில் இடியை இறக்கி உள்ளது.

தமிழ்நாட்டில் தமிழ், ஆங்கிலம் ஆகியவை தான் இருமொழி கொள்கை என்று அண்ணா முதல்-அமைச்சராக இருந்தபோது சட்டம் இயற்றப்பட்டது. இந்நிலையில் மத்திய பா.ஜ.க. ஆட்சி வீண் வம்பை விலைக்கு வாங்க வேண்டாம் என்று எச்சரிக்கிறோம். தமிழக முதல்-அமைச்சரும், பள்ளி கல்வித்துறை அமைச்சரும் இந்திக்கு இடமில்லை என்று கூறியிருப்பது வரவேற்கத்தக்கது ஆகும். இதில் உறுதியாக இருக்க வேண்டும். மத்திய அரசின் வற்புறுத்தலுக்கு வழக்கம் போல் அடிபணிந்து விடக்கூடாது.

காங்கிரஸ் கட்சியின் அகில இந்திய செய்தி தொடர்பாளர் குஷ்புவின் டுவிட்டர் பதிவு:-

குழந்தைகளும், அவர்களுடைய பெற்றோரும் விருப்பத்துக்கு ஏற்ப தேர்வு செய்யும் வகையில் தமிழகம் முழுவதும் உள்ள பள்ளிகளில் இந்தியை கட்டாயமற்ற பாடமாக விட்டுவிடுங்கள். ஏன் திணிக்கிறீர்கள்? உத்தரபிரதேசம், குஜராத், டெல்லி அல்லது ஏதாவது வட மாநிலங்களில் தமிழ், தெலுங்கு, கன்னடம் அல்லது மலையாளத்தை கட்டாயமாக்குவதை கற்பனை செய்து பார்க்க முடியுமா? இவ்வாறு அவர்கள் கூறியுள்ளனர்.

விடுதலை சிறுத்தைகள் கட்சி தலைவர் தொல்.திருமாவளவன் வெளியிட்டுள்ள அறிக்கையில் கூறியிருப்பதாவது:-

கஸ்தூரி ரங்கன் குழுவின் பரிந்துரையின்படி 8-ம் வகுப்பு வரையில் இந்தி கட்டாயமாக்கப்படும் என்கிற வரைவு அறிக்கையை மத்திய அரசின் மனிதவள மேம்பாட்டுத்துறை என்னும் கல்வி அமைச்சகம் வெளியிட்டுள்ளது. இதனை ஒட்டுமொத்த தமிழகமும் மிகக் கடுமையாக எதிர்த்துக் குரலெழுப்பியதும் மத்திய மந்திரிகள் அதனை மறுத்துள்ளனர். அது அரசின் கொள்கை முடிவல்ல என்றும், மக்கள் கருத்தை அறிந்த பின்னர்தான் அதன்மீது உரிய முடிவெடுக்கப்படும் என்றும் அறிவித்துள்ளனர்.

அது வரைவு அறிக்கையே ஆயினும், நம்மைச் சீரழிக்கும் நீண்டகால சதிதிட்டத்தின் முன்னோட்டம் என்கிற அடிப்படையில் தீவிரமாக எதிர்ப்பது நமது ஜனநாயக கடமை என்பதைச் சுட்டிக்காட்ட விடுதலைச்சிறுத்தைகள் கட்சி விழைகிறது. இந்த நிலையில், பா.ஜ.க.வின் சனாதன அரசின் இந்த ஜனநாயக விரோத மேலாதிக்கப் போக்கை விடுதலைச்சிறுத்தைகள் கட்சி வன்மையாகக் கண்டிக்கிறது. இவ்வாறு அவர் கூறியுள்ளார்.
மேலும் செய்திகள்
தே.மு.தி.க. சார்பில் நோன்பு திறப்பு நிகழ்ச்சி விஜயகாந்த், அமைச்சர் ஜெயக்குமார் பங்கேற்பு
தே.மு.தி.க. சார்பில் நோன்பு திறப்பு நிகழ்ச்சி சென்னையில் நேற்று நடந்தது. இதில் விஜயகாந்த், அமைச்சர் ஜெயக்குமார் உள்ளிட்டோர் பங்கேற்றனர்.
பதிவு: ஜூன் 03, 2019 00:00 AM மாற்றம்: ஜூன் 03, 2019 02:11 AM
சென்னை,

தே.மு.தி.க. சார்பில் நோன்பு திறப்பு நிகழ்ச்சி சென்னை கோயம்பேட்டில் உள்ள அக்கட்சியின் தலைமை அலுவலகத்தில் நேற்று நடந்தது.

இதில் கட்சியின் தலைவர் விஜயகாந்த், பொருளாளர் பிரேமலதா விஜயகாந்த், துணை செயலாளர் எல்.கே.சுதீஷ், அமைச்சர் டி.ஜெயக்குமார், வக்பு வாரிய தலைவர் அன்வர் ராஜா எம்.பி., த.மா.கா. துணைத் தலைவர் கோவை தங்கம், பா.ம.க. அமைப்பு செயலாளர் மு.ஜெயராமன், தமிழ் மாநில முஸ்லிம் லீக் தலைவர் ஷேக் தாவூத் உள்ளிட்டோர் பங்கேற்றனர்.

நிகழ்ச்சியில் அமைச்சர் ஜெயக்குமார் பேசுகையில், “முதல்-அமைச்சர் எடப்பாடி பழனிசாமி இதில் பங்கு பெறுவதாக இருந்தது. ஆனால் அவருக்கு வேறு நிகழ்ச்சியில் இருந்ததால் என்னை அனுப்பி வைத்திருக்கிறார். தமிழ்நாட்டில் எத்தனை கட்சிகள் இருந்தாலும் இஸ்லாமியர்களை கவுரவப்படுத்துவது அ.தி.மு.க.வும், தே.மு.தி.மு.க. வும் தான். சட்டசபையில் நாங்கள் ஒற்றுமையாக இருந்ததை பார்த்து கண் திருஷ்டி பட்டுவிட்டதோ, என்னவோ?. நம்முடைய கட்சியிலும் ‘ஸ்லீப்பர் செல்கள்’ இருந்திருக்கிறார்கள்” என்றார்.

விஜயகாந்த் பேசும்போது, “அனைவருக்கும் ரம்ஜான் வாழ்த்துகள்” என்றார்.
மேலும் செய்திகள்
இல்லாத இந்தி திணிப்பை காரணமாக காட்டி சுயலாப போராட்டங்கள் நடத்த சிலர் ஆயத்தமாகி வருகிறார்கள் தமிழிசை சவுந்தரராஜன் கண்டனம்
இல்லாத இந்தி திணிப்பை காரணமாக காட்டி சுயலாப போராட்டங்கள் நடத்த சிலர் ஆயத்தமாகி வருகிறார்கள் என்று டாக்டர் தமிழிசை சவுந்தரராஜன் கண்டனம் தெரிவித்துள்ளார்.
பதிவு: ஜூன் 03, 2019 00:00 AM மாற்றம்: ஜூன் 03, 2019 02:06 AM
சென்னை,

தமிழக பா.ஜ.க. தலைவர் டாக்டர் தமிழிசை சவுந்தரராஜன் வெளியிட்டுள்ள அறிக்கையில் கூறியிருப்பதாவது:-

இந்தியாவில் புதிய கல்வி கொள்கையை அமல்படுத்துவதற்காக அமைக்கப்பட்ட கஸ்தூரிரங்கன் குழு மத்திய அரசுக்கு ஓர் பரிந்துரை அனுப்பியுள்ளது. அந்த பரிந்துரையில் மும்மொழிக்கொள்கை பரிந்துரைக்கப்பட்டிருக்கிறது. அது மத்திய அரசால் இன்னும் ஏற்றுக்கொள்ளப்படவில்லை. முடிவும் செய்யப்படவில்லை. ஆனால் அதற்கு முன்பே ஏதோ இந்தி திணித்து விடுவதைப்போல மு.க.ஸ்டாலின், வைகோ, ப.சிதம்பரம், ரா.முத்தரசன் போன்றவர்கள் கடுமையான கண்டனத்தை இல்லாத இந்தி திணிப்பை நோக்கி செலுத்தியிருக்கிறார்கள்.

எங்கேயாவது போராட்டம் நடத்த வழி கிடைக்காதா? என தேடித்திரிபவர்கள், இல்லாத இந்தி திணிப்பை காரணமாக கொண்டு சுயலாப போராட்டங்கள் நடத்தலாம் என சிலர் ஆயத்தமாகி வருகிறார்கள். முன்னாள் மத்திய மனித வள மேம்பாட்டு துறை மந்திரி பிரகாஷ் ஜவடேகர் எந்த மொழியும் எந்த மாநிலத்திலும் திணிக்கப்படாது என்றும், மத்திய மனித வள மேம்பாட்டு துறை மந்திரி ரமேஷ் போக்ரியால் நிஷாங் இந்தி திணிக்கும் எண்ணமில்லை என்றும் கூறியிருக்கின்றனர். இதே கருத்தை பிரதமர் அலுவலகமும் தெரிவித்து இருக்கிறது.

மும்மொழிக்கொள்கை என்பது பரிந்துரை மட்டுமே செய்யப்பட்டிருக்கிறது. கொள்கை முடிவு அல்ல என்பதை தெளிவாகச் சொன்ன பிறகும் ஏதோ இந்தி திணிக்கப்பட்டதை போல கருத்துகளை தெரிவிப்பது சரியல்ல. கஸ்தூரிரங்கன் குழு எப்படி இப்படி ஒரு அறிக்கை தரலாம் என மு.க.ஸ்டாலின் கேட்கிறார். அறிக்கை கொடுக்கலாம் அதை ஏற்றுக்கொண்டால்தானே கொள்கை முடிவு. மு.க.ஸ்டாலின் மீத்தேன் ஆராய்ச்சிக்கு ஏன் கையெழுத்திட்டார்? முதலிலேயே முடியாது என்று சொல்லவில்லையே.

ஆக இனித்தால் படிக்கலாம் திணித்தல் இல்லையென்றும், விருப்பம் இருந்தால் படிக்கலாம் வெறுப்பு இருந்தால் வேண்டாம் என்றும், தேவையென்றால் படிக்கலாம் தேவை இல்லையென்றால் விட்டுவிடலாம் இது வெறும் வரைவு அறிக்கைதான் என்றும் சொல்லியாகிவிட்டது. ஆக ஏதாவது காரணம் கிடைக்காதா? போராட்டம் நடத்தலாம் என காத்துக்கொண்டிருக்கும் எதிர்க்கட்சிகள் ஏமாந்துதான் போவார்கள்.

இதைவிட வேடிக்கை என்னவென்றால் காங்கிரஸ் முதல்-அமைச்சர் பக்தவச்சலம் ஆட்சி காலத்தில்தான் இந்தி திணிப்பும், எதிர்ப்பாளர்கள் மீது துப்பாக்கி சூடும் நடந்தது. அதை எல்லாம் மறந்துவிட்டு இன்றைய காங்கிரஸ்காரர்கள் தி.மு.க.வுடன் சேர்ந்து இந்தியை எதிர்ப்பதாக சொல்வதுதான் நாடகம். இந்தியை மத்திய அரசின் அலுவல்களில் பயன்பாட்டை அதிகரிக்க அமைக்கப்பட்ட குழுவின் தலைவராக செயல்பட்ட ப.சிதம்பரம் இந்தி பயன்பாட்டை கண்டிப்பது வேடிக்கையாக இருக்கிறது. இவ்வாறு அவர் கூறியுள்ளார்.
மேலும் செய்திகள்