நாடாளுமன்ற தேர்தலில் தோல்வி எதிரொலி கர்நாடகத்தில் குமாரசாமி தலைமையிலான காங். கூட்டணி அரசுக்கு நெருக்கடி ஆட்சி கவிழுமா?
கர்நாடகத்தில் நாடாளுமன்ற தேர்தலில் காங்கிரஸ்-ஜனதா தளம் (எஸ்) கூட்டணி தோல்வி அடைந்ததால், குமாரசாமி தலைமையிலான அரசுக்கு நெருக்கடி ஏற்பட்டு உள்ளது. இதனால் ஆட்சி கவிழுமா? என்ற கேள்வி எழுந்து இருக்கிறது.
பதிவு: மே 27, 2019 00:00 AM மாற்றம்: மே 27, 2019 03:22 AM
பெங்களூரு,

கர்நாடகத்தில் காங்கிரஸ்-ஜனதா தளம் (எஸ்) கூட்டணி ஆட்சி நடைபெற்று வருகிறது. ஜனதா தளம் (எஸ்) மூத்த தலைவர் குமாரசாமி முதல்-மந்திரியாக இருக்கிறார்.

சட்டசபை தேர்தலில் காங்கிரசுக்கு 80 இடங்களும், ஜனதா தளம் (எஸ்) கட்சிக்கு 37 இடங்களும் கிடைத்தன. ஆனால் தனிப்பட்ட முறையில் இந்த இரு கட்சிகளையும் விட எதிர்க்கட்சியான பாரதீய ஜனதா அதிக இடங்களை (104) பெற்றது.

பாரதீய ஜனதாவை ஆட்சிக்கு வரவிடாமல் தடுப்பதற்காக காங்கிரசும், ஜனதா தளம் (எஸ்) கட்சியும் கூட்டு சேர்ந்து ஆட்சி அமைத்தன. என்றாலும் கூட்டணி அரசு அமைந்தது முதலே இரு கட்சிகளுக்கு இடையேயும் கருத்து வேறுபாடுகளும், மோதல்களும் இருந்து வருகின்றன.

இதனால் அந்த கூட்டணியில் உள்ள அதிருப்தி எம்.எல்.ஏ.க்களை இழுக்க அடிக்கடி பாரதீய ஜனதா ’ஆபரேஷன் தாமரை’ திட்டத்தை கையில் எடுத்தது. ஆனால் அதற்கு பலன் இல்லை.

இந்தநிலையில், கடந்த ஆண்டு டிசம்பர் இறுதியில் மந்திரிசபை மாற்றி அமைக்கப்பட்ட போது காங்கிரசை சேர்ந்த ரமேஷ் ஜார்கிகோளியிடம் இருந்து மந்திரி பதவி பறிக்கப்பட்டதால் கடும் அதிருப்தி அடைந்த அவர், தனது ஆதரவு எம்.எல்.ஏ.க்கள் 4 பேருடன் மும்பைக்கு சென்று தங்கினார்.

அந்த சமயத்தில் கூட்டணி அரசுக்கு ஆதரவு அளித்து வந்த சுயேச்சை எம்.எல்.ஏ.க் கள் 2 பேர், ஆதரவை திரும்ப பெற்றதால் கூட்டணி ஆட்சி கவிழும் நிலைக்கு தள்ளப்பட்டது. இதைத்தொடர்ந்து மும்பை சென்று தங்கியிருந்த காங்கிரஸ் எம்.எல்.ஏ.க்கள் மீது கட்சி தாவல் தடை சட்டத்தின் கீழ் நடவடிக்கை எடுக்கும் முயற்சியில் காங்கிரஸ் ஈடுபட்டதால், அவர்கள் அங்கிருந்து பெங்களூரு திரும்பி சட்டசபை கூட்டத்தில் கலந்துகொண்டனர். இதனால் பாரதீய ஜனதாவின் ஆட்சி கவிழ்ப்பு முயற்சி தோல்வியில் முடிந்தது.

அதன்பிறகு நாடாளுமன்ற தேர்தல் தொகுதி ஒதுக்கீட்டில் காங்கிரஸ்-ஜனதாதளம்(எஸ்) கூட்டணி கட்சி தலைவர்கள் இடையே மனஸ்தாபம் ஏற்பட்டது.

இந்த தேர்தலில் பாரதீய ஜனதா கர்நாடகத்தில் மொத்தம் உள்ள 28 நாடாளுமன்ற தொகுதிகளில் 25 தொகுதிகளை கைப்பற்றியது. காங்கிரஸ், ஜனதா தளம் (எஸ்) கட்சிகளுக்கு தலா ஒரு இடமே கிடைத்தது.

மண்டியா நாடாளுமன்ற தொகுதியில் பாரதீய ஜனதா ஆதரவு பெற்ற சுயேச்சை வேட்பாளர் நடிகை சுமலதா வெற்றி பெற்றார்.

நாடாளுமன்ற தேர்தலுடன் சிஞ்சோலி, குந்துகோல் சட்டசபை தொகுதிகளுக்கு நடைபெற்ற இடைத்தேர்தலில் சிஞ்சோலி தொகுதியில் பாரதீய ஜனதாவும், குந்துகோலில் காங்கிரசும் வெற்றி பெற்றன.

இதனால் சட்டசபையில் பாரதீய ஜனதா உறுப்பினர்களின் எண்ணிக்கை 105 ஆக உயர்ந்து உள்ளது. அதேசமயம் காங்கிரசின் பலம் (சபாநாயகர் உள்பட) 79 ஆக குறைந்துவிட்டது. ஜனதாதளம் (எஸ்) பலம் 37 ஆக உள்ளது. பகுஜன்சமாஜ் கட்சிக்கு ஒரு உறுப்பினரும், 2 சுயேச்சை உறுப்பினர்களும் இருக்கிறார்கள்.

ஏற்கனவே 2 சுயேச்சை எம்.எல்.ஏ.க்கள் பாரதீய ஜனதாவுக்கு ஆதரவு தெரிவித்து உள்ளனர். இதனால் சட்டசபையில் பாரதீய ஜனதாவின் பலம் 107 ஆக உயர்ந்து உள்ளது. கர்நாடகத்தில் பாரதீய ஜனதா ஆட்சி அமைக்க இன்னும் 6 எம்.எல்.ஏ.க்களின் ஆதரவு தேவையாக உள்ளது.

இதனால் காங்கிரஸ்-ஜனதாதளம் (எஸ்) கூட்டணி அரசை கவிழ்க்கும் முயற்சியில் பாரதீய ஜனதா ஈடுபட்டுள்ளதாக தகவல்கள் வெளியாகி உள்ளன.

ரமேஷ் ஜார்கிகோளி எம்.எல்.ஏ., தான் பாரதீய ஜனதாவில் சேரப்போவதாக ஏற்கனவே அறிவித்துவிட்டார். ரமேஷ் ஜார்கிகோளி மூலம் காங்கிரஸ் அதிருப்தி எம்.எல்.ஏ.க்கள் மகேஷ் கமடள்ளி, சீமந்தபட்டீல், நாகேந்திரா, லிங்கேஷ், ஆனந்த்சிங், சிவராம் ஹெப்பால்கர், சுதாகர் மற்றும் ஜனதாதளம் (எஸ்) கட்சியை சேர்ந்த நாராயணகவுடா ஆகியோரை தொடர்பு கொள்ள பாரதீய ஜனதா முயற்சி செய்து வருவதாக சொல்லப்படுகிறது.

அந்த எம்.எல்.ஏ.க்களுடன் ரமேஷ் ஜார்கிகோளி முதல்கட்ட பேச்சுவார்த்தையை நடத்தி முடித்து விட்டதாக கூறப்படுகிறது. பாரதீய ஜனதாவில் சேரும் மனநிலையில் உள்ள அந்த எம்.எல்.ஏ.க்களை கோவாவில் உள்ள ஒரு சொகுசு ஓட்டலில் தங்கவைப்பது தொடர்பாக ரமேஷ் ஜார்கிகோளி அங்கு சென்று வந்துள்ளார்.

இந்த ‘ஆபரேஷன் தாமரை’ திட்டத்தை மீண்டும் செயல்படுத்த பாரதீய ஜனதா மேலிடம் அனுமதி வழங்கி இருப்பதாகவும், மத்தியில் புதிய அரசு அமைந்த ஒரு மாதத்திற்கு பிறகு கர்நாடகத்தில் கூட்டணி அரசை கவிழ்த்துவிட்டு, ஆட்சி அமைக்கும் முயற்சியில் இறங்கும்படி அக்கட்சியின் மாநில தலைவர்களுக்கு உத்தரவிட்டு இருப்பதாகவும் தகவல்கள் வெளியாகி உள்ளன.

இந்த பரபரப்பான சூழ்நிலையில் காங்கிரஸ் எம்.எல்.ஏ.க்கள் டாக்டர் சுதாகர், ரமேஷ் ஜார்கிகோளி ஆகியோர் நேற்று பாரதீய ஜனதா மூத்த தலைவர்களில் ஒருவரான முன்னாள் முதல்-மந்திரி எஸ்.எம்.கிருஷ்ணாவை பெங்களூருவில் சந்தித்து பேசினர். அப்போது பாரதீய ஜனதா மாநில தலைவர் எடியூரப்பா, முன்னாள் துணை முதல்-மந்திரி ஆர்.அசோக் ஆகியோர் உடன் இருந்தனர். இந்த சந்திப்பின் போது 2 எம்.எல்.ஏ.க்களும் காங்கிரசில் இருந்து விலகி பாரதீய ஜனதாவில் சேருவது பற்றி அவர்களுடன் விவாதித்ததாக கூறப்படுகிறது.

அதுமட்டுமல்லாமல் காங்கிரசில் அதிருப்தியில் இருக்கும் மேலும் 10 எம்.எல்.ஏ.க்களும் பாரதீய ஜனதாவுக்கு செல்ல திட்டமிட்டு இருப்பதாக தகவல் வெளியாகி உள்ளது.

காங்கிரஸ் அதிருப்தி எம்.எல்.ஏ.க்களை கோவாவில் தங்க வைக்க பாரதீய ஜனதா தலைவர்கள் முடிவு செய்து உள்ளனர். இதற்காக கோவாவில் உள்ள ஒரு சொகுசு ஓட்டலில் 30 அறைகள் முன்பதிவு செய்யப்பட்டு இருக்கின்றன. அதிருப்தி எம்.எல்.ஏ.க்கள் எந்த நேரத்திலும் போர்க்கொடி தூக்குவார்கள் என்று கூறப்படுகிறது.

இதனால் குமாரசாமி தலைமையிலான காங்கிரஸ்-ஜனதாதளம் (எஸ்) கூட்டணி அரசுக்கு நெருக்கடி ஏற்பட்டு இருப்பதோடு, அரசு கவிழும் ஆபத்து இருப்பதாகவும் கூறப்படுகிறது.
மேலும் செய்திகள்
தொடர்புடைய செய்திகள்
கர்நாடகத்தில் முதல்கட்டமாக 14 தொகுதி களுக்கு ஏப்ரல் 18-ந் தேதி தேர்தல் நடைபெறுகிறது. இதற்கான வேட்புமனு தாக்கல் நாளை (செவ்வாய்க்கிழமை) தொடங்குகிறது. இதனால் வேட்பாளர் பட்டியலை இறுதி செய்யும் பணியில் அரசியல் கட்சிகள் தீவிரமாக ஈடுபட்டுள்ளன.
மோடியின் புதிய மந்திரி சபையில் யார்-யாருக்கு இடம்? பரபரப்பான தகவல்கள்
நரேந்திர மோடியின் புதிய மந்திரி சபையில் யார், யாருக்கு இடம் கிடைக்கும் என்ற பரபரப்பான தகவல்கள் வெளியாகி உள்ளன.
பதிவு: மே 27, 2019 00:00 AM மாற்றம்: மே 27, 2019 02:26 AM
புதுடெல்லி,

நாடாளுமன்ற தேர்தலில் பா.ஜனதா தலைமையிலான தேசிய ஜனநாயக முன்னணி ஆட்சியை தக்க வைத்துள்ளது. நரேந்திர மோடி மீண்டும் பிரதமராக தேர்ந்தெடுக்கப்பட்டுள்ளார். வருகிற 30-ந் தேதி பிரதமர் மோடி பதவி ஏற்கிறார். ஆனால் அவருடன் பதவி ஏற்க இருக்கும் மத்திய மந்திரிகள் யார் என்ற பட்டியல் வெளியிடப்படவில்லை.எனவே புதிய மந்திரி சபையில் யார் எல்லாம் இடம் பெறுவார்கள் என்ற எதிர்பார்ப்பு எழுந்துள்ளது. முந்தைய மந்திரி சபையில் இருந்த முக்கியமான மந்திரிகள் மீண்டும் மந்திரிசபையில் இடம்பெறுவார்கள் என்று சில தலைவர்கள் தெரிவித்தனர்.

நிதி மந்திரியாக இருந்த அருண்ஜெட்லி உடல்நிலை காரணமாக பதவி ஏற்கமாட்டார் என்ற கருத்து தெரிவிக்கப்பட்டது. ஆனால் மத்திய அரசும், நெருங்கிய நண்பர்களும் அருண்ஜெட்லி நன்றாக இருக்கிறார் என்று தெரிவித்துள்ளனர். அவர் சிகிச்சையின் மூலம் வேகமாக தேறி வருவதாகவும் கூறினர். ஆனாலும் அவர் மந்திரி சபையில் இடம் பெறுவாரா? என்ற கேள்வி எழுந்துள்ளது.

முந்தைய மந்திரி சபையில் இடம் பெற்றிருந்த ராஜ்நாத் சிங், நிதின்கட்காரி, நிர்மலா சீதாராமன், ரவிசங்கர் பிரசாத், பியூஸ் கோயல், நரேந்திரசிங் தோமர், பிரகாஷ் ஜவடேகர் ஆகியோர் மீண்டும் மந்திரிகளாக பதவி ஏற்பார்கள் என தெரிகிறது.

குஜராத் மாநிலம் காந்திநகர் தொகுதியில் அதிக ஓட்டுகள் வித்தியாசத்தில் வெற்றி பெற்ற பா.ஜனதா தலைவர் அமித்ஷாவுக்கு மந்திரி பதவி கிடைக்கும் என்ற தகவல் வெளியாகி உள்ளது. ஆனால் அவர் இதுபற்றி கருத்து தெரிவிக்க மறுத்துவிட்டார்.

பா.ஜனதாவின் கூட்டணி கட்சியான லோக் ஜனசக்தி கட்சித் தலைவர் ராம்விலாஸ் பஸ்வான் கடந்த மந்திரி சபையில் இடம் பெற்று இருந்தார். ஆனால் இந்த முறை அவரது மகன் சிராக் பஸ்வானுக்கு மந்திரி பதவி கிடைக்கும் என கூறப்படுகிறது. அந்த கட்சிக்கு 6 எம்.பி.க்கள் உள்ளனர்.

மற்றொரு கூட்டணி கட்சியான ஐக்கிய ஜனதாதளம் குறைந்தபட்சம் ஒரு கேபினட் மந்திரி பதவியும், ஒரு இணை மந்திரி பதவியும் கேட்பதாக தெரிகிறது.

பா.ஜனதா கட்சியின் கூட்டணி கட்சியான அ.தி.மு.க. கடந்த மந்திரிசபையில் இடம்பெறவில்லை. இந்த தேர்தலில் ஒரு தொகுதியில் மட்டுமே வெற்றி பெற்றிருந்தாலும், பா.ஜனதா கூட்டணியில் உள்ள முக்கியமான திராவிட கட்சி என்பதால் அக்கட்சிக்கு ஒரு மந்திரி பதவி கிடைக்கும் என எதிர்பார்க்கப்படுகிறது.

அதேசமயம் பா.ஜனதா இந்த தேர்தலில் மேற்குவங்காளம் மற்றும் தெலுங்கானா மாநிலங்களில் வலுவாக காலூன்றி உள்ளது. மேற்குவங்காளத்தில் 18 தொகுதிகளிலும் (கடந்த தேர்தலில் 2), தெலுங்கானாவில் 4 தொகுதிகளிலும் (கடந்த தேர்தலில் 1) வெற்றி பெற்றுள்ளது.

எனவே அந்த மாநிலங்களுக்கும் மந்திரிசபையில் அதிக முக்கியத்துவம் கொடுக்க பா.ஜனதா முடிவெடுத்துள்ளது. அந்த 2 மாநிலங்களிலும் வெற்றி பெற்ற சிலர் மத்திய மந்திரிகள் ஆவார்கள்.
மேலும் செய்திகள்
மூத்த தலைவர்கள் ஒதுங்கிக் கொண்டனர் மோடிக்கு எதிராக ராகுல் காந்தி தனியாக போராடினார் பிரியங்கா ஆவேசம்
மூத்த தலைவர்கள் ஒதுங்கிக் கொண்டதால், மோடிக்கு எதிராக ராகுல் காந்தி தனியாக போராடினார் என்று காங்கிரஸ் காரிய கமிட்டி கூட்டத்தில் பிரியங்கா பேசினார்.
பதிவு: மே 27, 2019 00:00 AM மாற்றம்: மே 27, 2019 03:14 AM
புதுடெல்லி,

நாடாளுமன்ற தேர்தலில் காங்கிரஸ் கட்சி தோல்வி அடைந்தது. தோல்வி பற்றி ஆராய காங்கிரஸ் காரிய கமிட்டி கூட்டம், நேற்று முன்தினம் நடைபெற்றது. அதில், 4 மணி நேரமாக காரசார விவாதம் நடந்துள்ளது.

அதுபற்றி காங்கிரஸ் வட்டாரங்கள் கூறியதாவது:-

காரிய கமிட்டி கூட்டத்தில், காங்கிரசின் தோல்விக்கு தார்மீக பொறுப்பேற்று காங்கிரஸ் தலைவர் பதவியை ராஜினாமா செய்ய ராகுல் காந்தி முன்வந்தார். தனது குடும்பத்தை சேர்ந்த வேறு யாரும் அந்த பதவிக்கு வருவதை, தான் விரும்பவில்லை என்றும் அவர் கூறினார். வேறு யாராவது காங்கிரஸ் தலைவராக இருக்க முடியாதா? என்றும் அவர் கேட்டார்.

ராஜினாமா முடிவை திரும்பப் பெறுமாறு அவரை சில மூத்த தலைவர்கள் வற்புறுத்தினர். அப்போது, வேதனை கலந்த முகத்துடன் காட்சி அளித்த பிரியங்கா குறுக்கிட்டு ஆவேசமாக பேசினார். “பிரதமர் மோடிக்கு எதிராக என் சகோதரரை தனியாக போராட விட்டுவிட்டு, ஒதுங்கிக்கொண்டீர்கள். நீங்கள் எல்லாம் அப்போது எங்கே இருந்தீர்கள்? மோடிக்கு எதிராக ரபேல் விவகாரத்தையும், ‘காவலாளி ஒரு திருடன்’ என்ற கோஷத்தையும் என் சகோதரர் எழுப்பியபோது, அவரை யாரும் ஆதரிக்க முன்வரவில்லை. காங்கிரசின் தோல்விக்கு காரணமான அனைவரும் இந்த அறையில் இருக்கிறார்கள்” என்று பிரியங்கா கூறினார்.

மேலும், “ராஜினாமா செய்வது, பா.ஜனதாவின் வலையில் விழுந்ததுபோல் ஆகிவிடும்” என்று கூறி, ராஜினாமா செய்ய வேண்டாம் என்று ராகுலிடம் அவர் வலியுறுத்தினார்.

ஒரு கட்டத்தில், ஜோதிர் ஆதித்ய சிந்தியா எழுந்து, “கட்சியின் மாநில தலைமைகளை வலுப்படுத்த வேண்டும்” என்று யோசனை தெரிவித்தார். அப்போது, கூட்டத்தில் இருந்த முன்னாள் மத்திய மந்திரி ப.சிதம்பரத்தை பார்த்த ராகுல் காந்தி, “தனது மகனுக்கு சீட் கொடுக்காவிட்டால், ராஜினாமா செய்து விடுவேன் என்று ப.சிதம்பரம் மிரட்டினார்” என்று குற்றம் சாட்டினார்.

அவர் தொடர்ந்து பேசுகையில், “ப.சிதம்பரம், மத்தியபிரதேச முதல்-மந்திரி கமல்நாத், ராஜஸ்தான் முதல்-மந்திரி அசோக் கெலாட் ஆகியோர் கட்சி நலன்களை புறந்தள்ளிவிட்டு, தங்கள் மகன்களை முன்னிறுத்துவதில் அக்கறை காட்டினர்.

தனது மகனுக்கு சீட் வாங்க முடியாவிட்டால், தான் எப்படி முதல்-மந்திரியாக இருக்க முடியும்? என்று கமல்நாத் கேட்டார். அசோக் கெலாட், தனது மகன் போட்டியிட்ட ஜோத்பூரில் 7 நாட்கள் பிரசாரம் செய்தார். மற்ற தொகுதிகளுக்கு அவர் செல்லவில்லை.

ரபேல் பற்றிய எனது பிரசாரத்தை கட்சியில் யாரும் ஆதரிக்கவில்லை. மோடி மீது நான் ஊழல் குற்றச்சாட்டு கூறியதை இங்கு இருக்கும் எத்தனைபேர் ஆதரித்தீர்கள்?” என்று கேட்டார்.

அப்போது, சில தலைவர்கள் கையை உயர்த்தினர். தாங்கள், ‘ரபேல்’ விவகாரம் பற்றி பேசியதாக அவர்கள் கூறினர். ஆனால் அதை ராகுல் காந்தி நிராகரித்தார். இவ்வாறு அந்த வட்டாரங்கள் தெரிவித்தன.

இந்த கூட்டத்தில் பிரியங்கா கடைசிவரை பங்கேற்றார். ராகுல் காந்தி, பாதியில் வெளியேறினார்.
மேலும் செய்திகள்
தொடர்புடைய செய்திகள்
ஐக்கிய முற்போக்கு கூட்டணி தலைவர் சோனியா காந்தி, காங். தலைவர் ராகுல் காந்தியை இன்று மயாவதி சந்தித்து பேச திட்டமிட்டு இருந்தார்.
பிரதமர் மோடி என்னுடைய குடும்பத்தை அவமதிக்கிறார், ஆனால் நான் அவரை அவமதிக்க மாட்டேன் என ராகுல் காந்தி கூறியுள்ளார்.
குத்துச்சண்டை களத்தில் இறங்கிய பாக்சர் மோடியின் முதல் குத்து மூத்த தலைவரான அத்வானிக்குதான் என ராகுல்காந்தி விமர்சனம் செய்தார்.
அமேதி தொகுதியில் போட்டியிடும் ராகுல் காந்தியின் வேட்பு மனு ஏற்றுக்கொள்ளப்பட்டது.
பிற்படுத்தப்பட்டவன் என்பதால் ராகுல் காந்தி எப்போதும் என்னை கிண்டல் அடிக்கிறார் என பிரதமர் மோடி கவலை தெரிவித்துள்ளார்.