பாடகர், நடிகர், கிரிக்கெட் வீரர் என நாடாளுமன்றத்தில் 300-க்கும் மேற்பட்ட புதுமுகங்கள்
ஒவ்வொரு தேர்தலிலும் ஏராளமான புதுமுகங்களை நாடாளுமன்றம் பெற்று வருகிறது.
பதிவு: மே 27, 2019 00:00 AM மாற்றம்: மே 27, 2019 03:14 AM
புதுடெல்லி,

அந்த வகையில் சமீபத்தில் நடந்து முடிந்த தேர்தலிலும் பல்வேறு துறைகளை சேர்ந்த 300-க்கும் மேற்பட்ட புதுமுகங்கள் வெற்றி பெற்று நாடாளுமன்றம் செல்ல உள்ளனர்.

இவர்களில் மாலேகான் குண்டுவெடிப்பில் கைது செய்யப்பட்டவரும், பெண் சாமியாருமான பிரக்யா தாகூர், சூபி பாடகர் ஹன்ஸ்ராஜ் ஹன்ஸ், முன்னாள் கிரிக்கெட் வீரர் கவுதம் கம்பீர், நடிகர் சன்னி தியோல் ஆகியோர் குறிப்பிடத்தக்கவர்கள் ஆவர்.

இவர்களை தவிர, பா.ஜனதாவின் மகத்தான வெற்றிக்கு மிக முக்கிய காரணமாக இருந்த கட்சியின் தலைவர் அமித்ஷா மக்களவைக்கு புதுமுகம் ஆவார். இதுவரை மாநிலங்களவை உறுப்பினராக இருந்து எதிர்க்கட்சிகளுக்கு பதிலடி கொடுத்து வந்த இவர், இனிமேல் மக்களவையில் பா.ஜனதாவுக்கு பெரும் பலமாக திகழ்வார் என கருதப்படுகிறது.

இதைப்போல மத்திய மந்திரியாக இருந்த ஸ்மிரிதி இரானி முதல் முறையாக மக்களவையில் அடியெடுத்து வைக்கிறார். அமேதி தொகுதியில் ராகுல் காந்தியையே வீழ்த்திய அவருக்கு கட்சியினர் மத்தியில் பெரும் வரவேற்பு உள்ளது. இவரைப்போல மாநிலங்களவை உறுப்பினராக இருந்து மந்திரி பதவியை வகித்து வந்த ரவிசங்கர் பிரசாத்தும் மக்களவைக்கு முதல் முறை உறுப்பினர் ஆகிறார்.

இத்தகைய புதுமுகங்கள் ஒருபுறம் இருக்க மறுபுறம் ஏராளமான மூத்த தலைவர்களை இந்த நாடாளுமன்றம் இழந்து இருக்கிறது. அந்தவகையில் பா.ஜனதா மூத்த தலைவர்கள் எல்.கே.அத்வானி, முரளி மனோகர் ஜோஷி, முன்னாள் சபாநாயகர் சுமித்ரா மகாஜன் ஆகியோர் மீண்டும் போட்டியிடாதது பா.ஜனதாவுக்கு மிகப்பெரும் இழப்பாக கருதப்படுகிறது.

மேலும் முந்தைய மக்களவையில் காங்கிரஸ் கட்சித்தலைவராக பொறுப்பு வகித்த மல்லிகார்ஜூன கார்கே, ஜோதிராதித்ய சிந்தியா போன்றவர்களையும் நாடாளுமன்றம் இழந்துள்ளது குறிப்பிடத்தக்கது.
மேலும் செய்திகள்
டெல்லியில் பிரதமர் மோடியுடன் ஜெகன் மோகன் ரெட்டி சந்திப்பு
டெல்லியில் பிரதமர் மோடியை ஒய்.எஸ்.ஆர். காங்கிரஸ் கட்சி தலைவர் ஜெகன் மோகன் ரெட்டி சந்தித்து வாழ்த்து பெற்றார்.
பதிவு: மே 26, 2019 00:00 AM மாற்றம்: மே 26, 2019 13:22 PM
புதுடெல்லி,

நாடாளுமன்ற தேர்தல் 7 கட்டங்களாக நடந்து முடிந்தது.  இந்த தேர்தலுடன் சேர்ந்து நடைபெற்ற ஆந்திர சட்டப்பேரவை தேர்தலில், தெலுங்கு தேச கட்சியின் தலைவரான முதல் மந்திரி சந்திரபாபு நாயுடுவை வீழ்த்தி, ஜெகன்மோகன் ரெட்டி தலைமையிலான ஒய்.எஸ்.ஆர்.  காங்கிரஸ் அபார வெற்றி பெற்று ஆட்சியை பிடித்துள்ளது.  அக்கட்சி மொத்தமுள்ள 175 தொகுதிகளில் 151 இடங்களை கைப்பற்றியது.

இதையடுத்து, ஆந்திர முதலமைச்சராக ஜெகன் மோகன் ரெட்டி பதவியேற்க உள்ளார்.  அவரை ஆளுநர் நரசிம்மன் முறைப்படி ஆட்சி அமைக்க வரும்படி அழைப்பு விடுத்துள்ளார்.  இதற்கான விழா விஜயவாடாவில் வரும் 30ந்தேதி நடைபெறுகிறது. 

இந்நிலையில் ஜெகன் மோகன் ரெட்டி இன்று டெல்லிக்கு சென்று பிரதமர் மோடியை சந்தித்து வாழ்த்து பெற்றார்.  இதையடுத்து, 30ஆம் தேதி நடைபெறும் பதவியேற்பு விழாவில் கலந்து கொள்ள வருமாறு பிரதமர் மோடிக்கு ஜெகன் மோகன் ரெட்டி அழைப்பு விடுத்தார்.  இந்த சந்திப்பில் ஜெகன் மோகனுடன் விஜய சாய் ரெட்டி மற்றும் அக்கட்சியின் பிற தலைவர்களும் உடனிருந்தனர்.
மேலும் செய்திகள்
குடியரசு தலைவரை சந்தித்து ஆட்சியமைக்க உரிமை கோரினார் நரேந்திர மோடி
குடியரசு தலைவரை சந்தித்து ஆட்சியமைக்க நரேந்திர மோடி உரிமை கோரினார்.
பதிவு: மே 25, 2019 00:00 AM மாற்றம்: மே 25, 2019 21:37 PM
புதுடெல்லி,

சமீபத்தில் நடந்து முடிந்த 17வது மக்களவை தேர்தலில் பா.ஜ.க. 303 இடங்களில் வென்று தனிப்பெரும்பான்மையுடன் உள்ளது.  பா.ஜனதா தலைமையிலான தேசிய ஜனநாயக கூட்டணி 350க்கும் அதிகமாக இடங்களை கைப்பற்றி இருக்கிறது.

இதனை தொடர்ந்து டெல்லியில் நடந்த பா.ஜ.க. கூட்டணி கட்சி எம்.பி.க்கள் கூட்டத்தில் பா.ஜ.க. நாடாளுமன்ற குழு தலைவராக பிரதமர் மோடி ஒருமனதாக தேர்வு செய்யப்பட்டார்.  இதன்பின்னர் பா.ஜ.க.வின் தேசிய தலைவர் அமித் ஷா தலைமையில், பிரகாஷ் சிங் பாதல், ராஜ்நாத் சிங், நிதீஷ் குமார், ராம்விலாஸ் பஸ்வான், சுஷ்மா சுவராஜ், உத்தவ் தாக்கரே, நிதீன் கட்காரி, கே. பழனிசாமி, கன்ராட் சங்மா மற்றும் நெய்பியூ ரியோ உள்ளிட்ட தேசிய ஜனநாயக கூட்டணி கட்சியினர் அடங்கிய குழு ஒன்று டெல்லி சென்றது.  அங்கு குடியரசு தலைவர் ராம்நாத் கோவிந்துடன் அமித் ஷா சந்தித்து பேசினார்.

இந்த சந்திப்பில், பா.ஜ.க.வின் நாடாளுமன்ற கட்சி தலைவராக நரேந்திர மோடி தேர்வு செய்யப்பட்டு உள்ளார் என்ற தகவல் அடங்கிய கடிதத்தினை ராம்நாத்திடம் அமித்ஷா வழங்கினார்.  

தேசிய ஜனநாயக கூட்டணி கட்சியினரின் ஆதரவு கடிதங்களும் அவரிடம் வழங்கப்பட்டன.  இதனை அடுத்து குடியரசு தலைவரை சந்தித்து ஆட்சியமைக்க நரேந்திர மோடி உரிமை கோரினார்.  அவரை ஆட்சியமைக்க குடியரசு தலைவர் அழைப்பு விடுத்துள்ளார்.  இதன்படி, வருகிற 30ந்தேதி பிரதமராக மோடி பதவியேற்க கூடும் என்று தகவல் தெரிவிக்கின்றது.
மேலும் செய்திகள்